Eguraldi ona eta oporrak, hondartzetaz gozatzeko gonbidapena dira askorentzat. Baina aisialdi garai honetan, ezin dugu alde batera utzi itsas baliabide garrantzitsu honen ingurumenarekiko errespetua. Horrela, Roberto Flores ilustratzaile iruñarraren laguntzarekin, komiki bat kaleratu du Cristina Enea Fundazioak ‘Hondartzak bizirik’ egitasmoaren barne. Beraren bidez gure hondartza, itsasertz eta areatzen erabilera egokiaz kontzientziatzeko, baita bertako baliabideak era arduratsuan erabiltzen irakasteko ere.
Eguraldi ona eta oporrak, hondartzetaz gozatzeko gonbidapena dira askorentzat. Baina aisialdi garai honetan, ezin dugu alde batera utzi itsas baliabide garrantzitsu honen ingurumenarekiko errespetua.
Denbora luzean, turismoa “industria garbia” dela pentsatu izan dugu, eta uste zen ia ez zuela ekosistemetan ondorio ezkorrik eragiten, baina 80. hamarkadan aurreneko alerta ahotsak entzuten hasi ginen eta eginiko hainbat ikerketaren arabera argi geratu da jarduera turistiko ez arduratsuek ur-masetan oso eragin negatiboak izan ditzaketela, baita bertan bizi diren animalia eta landareetan ere.
Aisiaren eta hondartza eta kostaren erabilera arduratsuaren artean oreka lortzea beharrezkoa da, bestela, urte batzuk barru agian ezin izango baitugu beraietaz gozatu. Eta horretarako ezinbesteakoak dira kontzientziazio eta sentsibilizazio kanpainak garatzea, baliabide turistiko hauen erabiltzaileen artean, hondartza eta itsasoen baliabide eta aberastasuna mahai gainean jartzeko eta jarduera egokiei buruzko informazio eskaintzeko.
Horrexegatik, bigarren urtez jarraian, Donostiako Udalaren kolaborazioarekin eta Ura,Uraren Euskal Agentziaren ko-finantzazioarekin, ‘Hondartzak bizirik’ egitasmoa jarri du abian Cristina Enea Fundazioak, 2011ko udan, garai honetan hondartzek jasaten duten presioa arintzeko neurriak proposatuz, berauen erabilera egokiari buruzko kontzientziazioa eta sentsibilizazioa sustatuz gizartean.
Horrela, Roberto Flores ilustratzaile iruñarraren laguntzarekin, komiki bat kaleratu dugu, beraren bidez gure hondartza, itsasertz eta areatzen erabilera egokiaz kontzientziatzeko, baita bertako baliabideak era arduratsuan erabiltzen irakasteko ere.
