Itsasoa etengabe aldatzen ari den ingurunea da. Ozeanoan jarduten duten faktoreen eraginez, itsaslasterrak, olatuak eta mareak sortzen dira. Olatuak haizeak sortzen ditu; marea Lurraren, Ilargiaren eta Eguzkiaren grabitazio-erakarpenaren ondorioa da; eta itsaslasterrak haizeak eta tenperaturaren eta gazitasunaren gorabeherek eragiten dituzte, edo marearen edo olatuen ondorio dira.
Itsasoa etengabe aldatzen ari den ingurunea da. Ozeanoan jarduten duten faktoreen eraginez, itsaslasterrak, olatuak eta mareak sortzen dira. Olatuak haizeak sortzen ditu; marea Lurraren, Ilargiaren eta Eguzkiaren grabitazio-erakarpenaren ondorioa da; eta itsaslasterrak haizeak eta tenperaturaren eta gazitasunaren gorabeherek eragiten dituzte, edo marearen edo olatuen ondorio dira.
Haizearen energiaren zati handi bat ozeanoak bereganatu eta olatuak sortzen ditu, haize-olatuak esaten zaienak, alegia. Haize-olatuak sortzen direnean, hondoko itsasoa eratzen da; hau da, olatuak ugaritu egiten dira, eta depresio-gunetik ehunka, baita milaka kilometrora ere, urruntzen dira. Bizkaiko golkoaren konfigurazio geografikoaren eta haize nagusien eraginez, ohiko olatuak ipar-mendebaldekoak dira eta ia ez dago hegoaldeko eta ekialdeko olaturik.
Urtean zeharreko olatuen banaketak, beraz, zuzeneko lotura du urtaroko fronte eta depresioen eraketarekin. Bi aldi izaten dira: udaldia (apiriletik irailera), ia olatuen % 75ek metro bete baino gutxiago hartzen dute (itsaso barea, itsaso kizkurra edo itsaskirria); eta negualdia (urritik martxora), olatuen % 75ek baino gehiagok metro bete baino gehiago hartzen dute (sagailoa). Batez beste, itsaso zakarra izaten da 30 egunetan (2,5 metroko olatuak); urteko egun batean, olatuek 5 metro baino gehiago hartzen dute (itsaso oso zakarra); eta urteko olaturik handiena gutxienez 7,5 metrokoa da (itsaso handia).
Bizkaiko golkoko marea astronomikoa egun erdikoa da; hau da, 24 orduko aldian bi itsasgora eta bi itsasbehera izaten dira. Marea-uhinaren % 75 Ilargiaren eraginpean dago, eta gainerako % 25a eguzkiaren eraginpean. Marea-uhina mendebaldetik sartu eta ekialderantz hedatzen da, eta, golkoan sartzen den heinean, haren anplitudea handitu egiten da. Marea hila denean, batez besteko marearen maila 1,5 metrokoa da, eta marea bizietan, ia 4 metrokoa. Urteko gehienezko maila 4,5 metro baino gehiagokoa da.
